'A forza d' 'e mmane

Si cu 'sti mmane putesse accuncià 'a cerevella,
a cchi è nzipeto e ttene 'a capa sciacqua.
Si putesse da' a bbevere a cchi tene sete:
ogni ccisterna vacante, 'a rignesse d'acqua.
Si putesse vuttà 'o mmalamente assaje luntano:
ah, si 'o pputesse fa'...ausanno 'e mmane!

Si 'e tutto chello ca mm'hâ turbato nfin'ajere
nne putesse fa' tanta cule 'e bbicchiere!
Si ogni ccosa faveza putess'essere overa.
Si ogni ssuonno s'avverasse cu 'o penziero!
Si sulamente cu 'a forza 'e vuluntà putesse,
senza perdere cchiù ttiempo...i' 'o ffacesse.

Nun me mpurtasse si ce mettesse 'a faccia.
Ggiurasse annanze a ttutte 'e sante, 'a Ddio
e ccu ttutta 'a forza ca tengo into 'e mmane
schiaffiasse chi saccio...e cchi voglio i'.
Pusasse treciento, mille o cchiù ccarezze,
ncopp'a 'e ffacce triste d' 'a povera ggente.

Paccariasse e ffacesse 'a faccia rossa,
a chi se ll'ammereta: a cchi è stato fetente.
Desse na mana 'a ttutta a ggenta ppuverella,
a cchi fa fatica a ppurtà 'a cardarella.
Stracciasse tutto 'o cchiù 'a into 'e mmane
e chi s'ha arrubbato chello ca spettava a ll'ate.

Mme pigliasse tutto chello ca è suvierchio,
'a dinto 'e mmane 'e chi se ll'ha arrubbato. 
Scippasse 'a maschera a coppa 'a faccia,
'e chi va spannenno tuorte tuorno tuorno.
Facesse mmodo ca ogneduno vedesse,
'e che cculore è ffatta 'a faccia 'e cuorno.

Si mmece 'e doje, tenesse ciento o mille mane,
sulo i' saccio...chello ca mme firasse 'e fa'.
Mmece tengo ddoje manelle sulamente: 
faccio chello ca me riesce, chello ca pozzo fa'.
Si putesse, fermasse tutto 'o mmale...'a luntano.
Si putesse, che mme firasse 'e fa' cu cchesti mmane!
Giovanna Balsamo