Sostieni anche tu il nostro sito
Scritto da © Antonio Cristof... - Gio, 04/07/2013 - 04:38
RISVEGLIO BRUSCO
Lassateme durmì.
Che me ne ‘mporta
si mo ‘o sole nasce
‘a dint’’o mare?
Che me ne ‘mporta
si mò nu ragge se stenne
dint’’all’onne quiete e chiare?
E ch’aggia fa’
si già s’è fatte juorne
e ‘sta nuttata è passata
a penzà a te?
Che pozzo dì
si ‘st’uocchie
mò se chiudono
‘int’’a ‘st’immensità?
RISVEGLIO DOLCE
Canta l’ultimu gallo e, ‘a cchiù luntane,
‘nat’ultimo risponne. ‘A nu podere
strilla ‘na gallina e, ‘mmiezz’’a via,
c’’a vanga ‘ncopp’’e spalle e ‘na falcetta,
s’avvia Santino lemme lemme ‘o passo.
Sossio for’’o puntone(1) sta c’aspetta.
-Bona salù…- e ‘nzieme se ne vanno.
Angelina canta e stenne ‘e panne
pe’ ‘ncopp’’e file fore a ‘o terrazzino.
Spanne e s’affacia, po’ s’affacia e spanne
e se sta accorta si passa Giacumino.
E passa Giacumino ‘o verdummaro.(2)
Passa e s’’a chiamma. Angela s’affaccia
cu’ nu lenzuolo tutto ‘nfuse (3) ancora,
e tant’è ‘a foga che ce ‘o scote ‘nfaccia
e ll’ato ride e cu’ ll’uocchie s’’a divora.
Ah, c’armunia
fa ‘e cafè ‘st’addore
che fuje da cafettera ‘a casa mia!
Se stenne ‘stu prufumo tutt’attuorne,
s’ammesca po’ cu’ ‘n ato e se cunfonne,
ma nun ve sacce dì che d’è st’addore.
Forse sarà ‘st’Inverno che mò more,
‘sta Primavera che se sta scetanne.
cert’è che ‘stu bellu sapore
chest’anema sulagna sta ‘ncantanne.
NOTE
1) Angolo
2) Ortolano
3) Bagnato
»
- Blog di Antonio Cristoforo Rendola
- 770 letture
le nostre pubblicazioni 
