Sostieni anche tu il nostro sito
Scritto da © Antonio Cristof... - Lun, 01/04/2013 - 12:53
Trattta dalla mia raccolta di poesie in vernacolo "'O cielo a cupertelle"
‘Nu punticiello spierzo e abbandonato
‘ncopp’ a ‘na “O” pe’ sbaglio se pusaie.
Divette a “O”:- Oi nì che cazzo faie?
Addò te puose? Tu comme staie stunato!-
-Scusate mia signò…- dicette ‘o punto,
e ghiette a cercà ‘n’ata cumpagnia.
Gira e rigira truvaie ‘na “E” ‘e passaggio
E s’acalaie pe copp’’a sbarretella.
-Oi nì…- dicette chella muccusella
-nun me seccà! Vattenne che m’arraggio!-
-Scusate mia signò…- dicette ‘o punto,
e ghiette a cercà ‘n’ata cumpagnia.
Stesa pe’ terra che s’arrepusava,
‘na “U” ‘nfruciuta ‘e suonno se ne steva,
e suonno pure ‘o punto ne teneva
tanne che ‘ncopp’’a “U” ce s’avviava
-Oi nì.- dicette chella scurnacchiate
- Vide addò ì, vide addò schiara iuorno,
che casomai, nun propeto unu cuorno,
ma in tedesco ddueie me so puntate.-
-Scusate mia signò…- dicette ‘o punto,
e ghiette a cercà ‘n’ata cumpagnia.
Cchiù tarde se pusaie ‘ncopp’a ‘na “A”
Asciuta chi sa ‘a quale sillabario. –Oi nì
curre, fa ambresso addò sta ‘a “I”.
Muovete, spicciete e vavattenne ‘a ccà!-
-Scusate mia signò…- dicette ‘o punto,
e ghiette a cercà chella cumpagnia.
‘A truvaie puverella, scunsulata
che sbariava e girava comm’’a pazza.
Ieve dicenne ‘a “I”:- Ccà ce sta ‘a mazza
che mazza resta si nun è puntata!-
-Scusate mia signò…- dicette ‘o punto – sopra quest’asta
Forse vi servo io?- - Proprio accussì!-
Allora se chiavaie pe copp’a “I”
E disse finalmente:- Punto e basta!-
»
- Blog di Antonio Cristoforo Rendola
- 1733 letture
le nostre pubblicazioni 
