Comme fosse na maggìa

 
Primmavera s’è vestuta  a file ’e sole
e affacciata a copp’ ’e nuvole cchiù vasce
sta scetanno chesti fresie e ’sti vviòle
ca ’mprufumano ccà, tutt’attuorno a mme.
 
Mentre smove lentamente ’e vvocche ’e lupo
nfacci’ ’o muro  d’ ’o curtile arrampecate;
suspiranno mette ’a vite dint’ ’a ll’aria
ogni cosa, essa, fa arresuscità.
 
 Ântrasatto, comme fosse na maggìa.
                                            
 Nun ve dico che me sento ’int’ ’a ’stu core;
 pare proprio ca è turnato
 n’ata vota ’a sfrennesià’.