Quanno mme frullene 'ncapa penziere tutte ammiscate:
m'arricordo cose c'avevo 'e pressa 'e pressa cancellato.
Ma 'a capa mia è comm'â n'osteria: 'na grossa cantina:
addò ogni ricordo fermenta e po' addeventa vino.
Ce tengo 'stipate butteglie: vecchie, giovene e d'annata.
So' tutte bbone, belle e nnisciuna è meglio 'e n'ata.
Songhe vine ca me stappo pe chissà quacche occasione
o pe quanno 'e ccose 'nun me vanno tanto bbone.
Mò mò mme stà turnanne 'mmente 'nu penziero,
c'aggio attappato, 'nun saccio si ogge o ll'autre jere.
Putesse pare' pe cchiù 'e uno assaje banale,
ma a mme me piace: me ll'arricordo tale e qquale.
Steve annascuso, tutto scurnuso, sotto a 'na spasella,
'nu pezzullo 'e spavo sfilacciato e suttile: 'na curdicella.
'Nponta teneva, tutta scagnata e scardata:
'na truttulella, assaje storta, brutta e scancinata.
Guardannela 'nun saccio quanto m'aggio emozionato. -
"Ma chisto è 'o strummolo - aggio subbete penzato.
Ma po' distraenneme e tenenne ciento cose 'a pensa'?
mm'ô guardo, m'ô ggiro e llà 'nterra 'o vaco a pusa'.
Però m'ha fatto arricurda' 'e cumpagnielle d'ô quartiere,
quanno cu 'na pazziella tricaveme 'nfino a tarda sera.
Nuje piccerille mentre mammà ce chiammava,
mentre 'o strummolo tutto culurato e allero aggirava.
'Na sola pazziella e nuje n'ereme tante,
'Nu giro p'ognuno e pazziaveme tutte quante.
Cchiù 'o strummolo aggirava e cchiù ce piaceva.
Aspettaveme ansiuse c'â 'o ggiro ferneva.
- So' stato 'o cchiù bbravo - 'nu cumpagno alluccava:
accussì s'accumminciava e 'o strummolo aggirava.
Però quanta ricorde s'affollene dint'â capa mia:
allera, pazziariella e ssempe chiena 'e fantasia.
Picciò quanno tutto ammanca, arrapo 'e pporte 'e st'osteria
e mme surzeo 'nu paro 'e ricorde c'ô sapore 'e nustalgia...
Giovanna Balsamo
- Blog di Giovi55
- 1381 letture