Sostieni anche tu il nostro sito
Scritto da © Antonio Cristof... - Mar, 30/04/2013 - 05:27
Tratta dalla mia raccolta “’O cielo a cupertelle”
Mi sembra di vederli questi due vecchietti che non ricordano perché finì il loro amore. Che tenerezza! Ma tutto il lasciato è perduto.
Don Ciro steve ‘ncopp’’a Vicaria,(1)
‘o terzo piano ‘e nu palazzo antico.
A ‘o quarto piano steve ‘onna Maria.
Ognuno ‘e lloro aveva anni settanta.
Don Ciro s’’e purtava buone assai,
donna Maria ‘e mustrava tutte quante.
Dint’’a cuntrora, ogni santa iurnate,
‘a vecchia s’affacciava a ‘o terrazzino
e cu’ santa pazienza ‘o cardellino
faceva abbeverà ch’era cecate.
E pure ‘o viecchio allora asceva fore,
faceva ‘o ppoco ‘e tosse e s’affacciava,
calava ‘a capa, ma ‘ncopp’isse guardava.
Cu’ ll’uocchie arrevutava pure ‘o core.
Guardava e nun diceve ‘na parola.
Cercava da’ truvà, ma vatt’’a pesca!
Arruminava va a capì qua mesca
e sfruculiava c’’o piedo ‘na riggiola.(2)
‘Ni iuorno s’affacciaie e risolvette:
-Donna Marì, scusate, ‘na preghiera…-
c’’o dito appena aizzato da ringhiera
e ‘a vocia tremmula c’ascette e nun ascette.
-Comm’è che nuie, Aprile trentasette,
proprio sott’’a Madonna ‘e Piederotte, (3)
struncaieme chill’ammore e buonasera?-
-Era trentotto, nun era trentasette…-
facette ‘a vecchia c’’a becchiera ‘nmane.
-Chelle ch’è state è state. l lle dicette.
-Chelle ch’è state è state, ma pecchè?-
-‘A verità, manch’io ricordo ‘on Ci’.-
-Possibile? Vuie nun v’allicurdate ‘onna Marì?-
-Nun m’allicordo! Vuie che vulite ‘a me?-
Don Ciro tenneiava poco convinto:
-Si vede che non c’era affinità…-
- Si…- ll’ata dicette – questa cosa qua…-
e steva per tornarsene ‘a via ‘e dinto.
-Donn Marì…Sereno…Se farà…
Domani…Ve’ facisseve dduie passe
comm’imme fatto cinquant’anne fa?-
-Dduie passe..? ‘Nsacce che…- Dicite si!-
Chiove e ‘nu lampo appiccia ‘o cielo all’intrasatte!
Romba ‘nu tuone! Po’ ‘a vecchia fa distratte:
-Allora ‘on Cì, sereno era venì!-
1 Vicaria, zona dove sorge il vecchio palazzo di giustizia.
2 Strofinava un piede su una mattonella.
3 Chiesa della Madonna di Piedigrotta a Mergellina.
»
- Blog di Antonio Cristoforo Rendola
- 1420 letture
le nostre pubblicazioni 
