Festa a Pianillo

(Pianillo è una ridente frazione di Agerola che si erge sui monti Lattari dall'alto dei quali domina la costa amalfitana. Agerola è detta: "Il balcone di Dio"

 

 

Festa a Pianillo!

 

‘Stammatina è ‘Assunta.(1)

 

C’’a tromba ‘mmano

e ‘o spartito, ammappuciato,(2)

dint’’a sacca,

sott’’o braccio a ‘o trumbone,(3)

‘o capo-banda se sta

‘ncopp’’o puntone(4)

d’’a chiesa ‘mmiezz’’a

piazza principale.

 

A’ uno a’ uno ll’ati musicanti

veneno ‘a Campora,

Santa Maria, San Lazzaro,

Pianillo, Ponte e Bomerano:(5)

Catiello c’’a grancassa;

c’’o clarino Gregorio e Aniello;

ch’’e piatte Giacumino.

 

‘O parroco ‘on Naclerio Ferdinando

se sbatte ‘ncopp’a soglia d’’a parrocchia:

è tardi e p’’a Madonna ‘Mmaculata

‘a prucessione ancora ‘nz’è furmata.

 

A fila a fila

arrivano ‘e vattiente(6)

c’’o manto azzurro

e ‘a palandrana rosa.

Vermiglia è ‘a stola,

ciclamina ‘a fascia,

nera è ‘a curona

e ‘a cammisa viola.

 

Ch’’e gigli ‘nmano

e ‘o mantesino bianco,

se va furmanne

de’ criature(7) ‘a fila.

Cchiù gruosso è Sante,

quatt’anne tene Livio,

e tre ne tene

sule tre Viulante.

 

Bandiere gialle

volano pe’ cielo,

e rosse e verde

s’aizzano all’istante.

Una è l’azzurra

e ‘n’ata è rossa e nera

e stanne a ‘o viento,

stanne tutte quante.

 

Ecco! D’’e scale,

fore ‘o purtecone

d’’a chiesa da

Madonna Addulurata,

Assunta(8) è asciuta

cu’ ‘na faccia ‘e cera,

‘e mane ‘nzine(9)

e ‘a vesta culurata.

 

‘Aitano allucca,(10)

chiagne(11) ‘onna Virginia.

Totore guarda

c’’o naso aizzat’’o sole.(12)

‘Ncenzeia(13) ‘on Naclerio

senza ‘na parola

e dice appena:

-Benedicti vos-.

 

So’ tutti pronti

e parte ‘a prucessiona,

a passo lento,

a passo cadenzato.

‘A banda ‘ntona

e canta ogni guagliona.

 

Se sente ‘o canto

che sciulia e va in pianura,

l’eco ca scenne, po’ da custiera torna:

“Ti salutiamo Vergine,

colomba tutta pura…”