Sostieni anche tu il nostro sito
Scritto da © Antonio Cristof... - Lun, 15/04/2013 - 05:26
Dicette a ‘na cipolla ‘o spicchio ‘e ‘n aglie:
-‘A so’ (1) dimme pecchè ‘a gente chiagne
si a fette qualche vota po’ te taglie?-
E chella rispunnette amaramente:
-T’’o dico e nun ripeto, chesta lagne
‘a fanne pecchè ‘a genta è malamente.
Me tenene pe’ ‘ncopp’’a balcunata,
tanto ca io dico: ma che bella ciorta!(2)
Po’…zacchete! Me danno ‘a curtellata!
Me fanno a piezze dint’’a ‘na tiella,(3)
e, quando po’ me vedono stramorta,
me chiagnene pecchè so’ troppo bella!
E tu? Pecchè? Pecchè cumpagne mie
tiene ‘sta ciorta ‘nfama comme a me?
Che ‘a spicchie te fa ‘a gente e po te frie?- (4)
-Forze sarrà pe’ bia da’ pallidezza
‘e chesta carna mia ch’è janca, oi né.
Forz’è ‘st’addore che tutte cose allezza.(5)
Sarrà accussì ca po’ ‘int’’a tiella,
affucato dint’’all’uoglio da’ frittura,
me fanno piglià sempre ‘a tintarella.-
(1) Sorella
(2) Sorte
(3) Padella
(4) Frigge
(5) Contamina con l'odore - fa puzzare.
»
- Blog di Antonio Cristoforo Rendola
- 1129 letture
le nostre pubblicazioni 
