Affacciato a 'stu balcone

A te penso ogni matina

quando arapo ‘stu balcone

e a chest’aria fresca e fina

io mi metto a risciatà.

 

Faccio ‘a tosse casualmente,

po’ me stiro bello e buone,

ma tu nun me tiene mente,(1)

tu nemmanco te ne adduone.(2)

 

Po’ m’affaccio ‘n’ata vota

cu’ ‘na tazzulella ‘mmane,

bevo e ‘a capa s’arrevota

quando tu schiure ‘a persiana.

 

Stongo tanto rimbambito

che me scordo ‘o cucchiarine,

e accussì giro co’ dito

‘o ccafè dint’a tazzine.

 

E tu nun me tiene mente!

Tu nemmanco te ne adduone.

Me cunzume io lente, lente

comme ‘o cippo ‘e Sant’Antuone.(3)

 

Ma, guardanne ‘stu balcone

nun appena jesce tu fore,

va ‘o ccafè in ebollizione

e me volle ‘nzieme ‘o core!

 

(1)  Non mi presti attenzione.

(2)  Non te ne accorgi neanche.

(3)  Dopo Natale si celebra la festa di S.Antonio Abbate durante la quale si accendono roghi (cippi) sui quali si bruciano i  poveri abeti utilizzati come alberi natalizi.