'Nce steva 'na femmena, dinto a 'nu castello,
ca faceva 'a padrona atturniata a damigelle.
'Mmiezo a tanta ciure essa era 'a cchiù bella,
lle piaceva 'e fà 'a riggina fra tutt'ê rruselle.
'Nu bellu juorno, 'o pizzaiuolo Ernesto,
ca 'a tiempo 'mmemore faceva 'o masto 'e festa,
arriunette tutt'ô populo ca ghieva 'ncuntranne:
pecchè aveva appripara' ll'evento 'e ll'anno.
'Na folla 'e cuoche affullajene 'a cucina,
pe 'nciarma' 'na pizza degna e' 'na reggina.
'Na ciaciona pupulana a nomme donna Rosa,
'mpastaie pe 'ncopp'ô tavolo 'na panella sfiziosa.
Cu forte bbraccia e 'na mana bella spiccia,
ammescanne acqua e farina, appriparaje 'a pizza.
'Ncoppa 'nce mettette foglie 'e vasenicola,
murzille 'e muzzarella, d'ô piennolo 'e pummarole.
P'ê scale d'ô palazzo se senteva n'addore!
'A riggina s'annammuraje subbete 'e chillu sapore.
Strille 'e cuntentezza pe 'a gioia essa menaje:
'a pizza lle piacette e fuje cuntenta assaje.
'E cuoche 'e corte se mustraiene
assaje liete,
vedenne ca 'a regina s'alleccava 'e ddete.
Succedette ca chella pizza, d'â regina tanto gradita,
'a vulettene chiamma' c'ô nomme 'e Margherita.
'Sta bannera janca, rossa e verde n'ha girato 'e paese!
Va giranne tuorno tuorno: avantanne ciente 'mprese.
È 'nu triculore ca sventola e
'nun perdarra' maje vita.
È 'o lustro e 'o vanto 'e Napule: è 'a pizza margherita!
Giovanna Balsamo
- Blog di Giovi55
- 1582 letture